29
Wed, Jan
433 New Articles

လေယာဉ်ပျက်ကျမှုကို စုံစမ်းစစ်ဆေးရေးအတွက် Black box များကို ဘိုးရင်းထံလွှဲပေးရန် အီရန် ငြင်းဆို

အီရန်နိုင်ငံတွင် ဘိုးရင်း 737 လေယာဉ် ပျက်ကျသွားသည့်နေရာတွင် ကယ်ဆယ်ရေးသမားများ လုပ်ကိုင်နေကြသည်ကို တွေ့ရစဉ် (ဆင်ဟွာ) Africa & Middle East

တီဟီရန်၊ ဇန်နဝါရီ ၉ ရက် (ဆင်ဟွာ)

အီရန်အနေဖြင့် နိုင်ငံအတွင်း ပျက်ကျသွားသော လူ ၁၇၆ ဦးလိုက်ပါသွားသည့် ယူကရိန်းလေကြောင်းလိုင်းပိုင် လေယာဉ်မှ တွေ့ရှိခဲ့သည့် လေယာဉ်ပျံသန်းမှု အလိုအလျောက်အသံဖမ်းကိရိယာ (Black box) နှစ်ခုကို ဘိုးရင်းကုမ္ပဏီ သို့မဟုတ် အမေရိကန်နိုင်ငံထံ လွှဲပြောင်းပေးမည်မဟုတ်သော်လည်း ယူကရိန်းနိုင်ငံနှင့် ပူးပေါင်းဆောင်ရွက်သွားမည်ဖြစ်ကြောင်း အီရန် ပြည်သူ့လေကြောင်းအာဏာပိုင်က ပြောကြားလိုက်သည်။

လေယာဉ်၏ အသံဖမ်းယူစက်နှင့် အချက်အလက်ဖမ်းယူစက် နှစ်ခုလုံးကို တွေ့ရှိခဲ့ပြီးဖြစ်ကြောင်း အီရန်နိုင်ငံပိုင် ရုပ်မြင်သံကြားက ဇန်နဝါရီ ၈ ရက်တွင် ဖော်ပြခဲ့သည်။

အီရန်နိုင်ငံတွင် ဘိုးရင်း 737 လေယာဉ် ပျက်ကျသွားသည့်နေရာတွင် ကယ်ဆယ်ရေးသမားများ လုပ်ကိုင်နေကြသည်ကို တွေ့ရစဉ် (ဆင်ဟွာ)

ဘိုးရင်း 737 ယူကရိန်း ခရီးသည်တင်လေယာဉ်သည် ဇန်နဝါရီ ၈ ရက် နံနက်ပိုင်းက တီဟီရန်မြို့ အီမန် ခိုမေနီအပြည်ပြည်ဆိုင်ရာလေဆိပ်အနီး ပျက်ကျသွားခဲ့ပြီး လေယာဉ်ပေါ်လိုက်ပါသွားသည့် ခရီးသည်များနှင့် အမှုထမ်းအားလုံး သေဆုံးသွားခဲ့သည်။

အီရန်နိုင်ငံအနေဖြင့် အဆိုပါ Black box များကို စစ်ဆေးရန် မည်သည့်နိုင်ငံသို့ပေးပို့မည်ကို ရှင်းရှင်းလင်းလင်းမသိရသေးကြောင်း၊ လေယာဉ်ပျက်ကျမှုကို ပူးတွဲစစ်ဆေးရန် ယူကရိန်းကလည်း ကြိုဆိုကြောင်း အီရန် ပြည်သူ့လေကြောင်းအဖွဲ့အစည်း အကြီးအကဲ အလီအာဘတ်ဇာဒါ၏ ပြောကြားချက်ကို ကိုးကား၍ အီရန် Mehr သတင်းအေဂျင်စီက ဖော်ပြခဲ့သည်။

အဆိုပါ လေယာဉ်ပျက်ကျမှုမှာ လေယာဉ်မှူး၏အမှားကြောင့်ဖြစ်သည်ဆိုခြင်းကို ယူကရိန်း အပြည်ပြည်ဆိုင်ရာလေကြောင်း တာဝန်ရှိသူများက ငြင်းဆိုထားပြီး လေယာဉ်မထွက်ခွာမီ ပြုပြင်ထိန်းသိမ်းမှု လုပ်ဆောင်ခဲ့သည်ဟု ဆိုသည်။ ယင်းလေယာဉ်အား ၂၀၁၆ ခုနှစ်တွင် တည်ဆောက်ခဲ့ပြီး လေယာဉ်ထုတ်လုပ်သူသည့် ဘိုးရင်းကုမ္ပဏီက လေကြောင်းလိုင်းသို့ တိုက်ရိုက်ပို့ဆောင်ခဲ့ခြင်း ဖြစ်ကြောင်း သိရသည်။

အီရန်တွင် ၎င်းလေယာဉ်ပျက်ကျပြီးနောက် လိုအပ်သော မည်သည့်အကူအညီမျိုးကိုမဆို ထောက်ပံ့ရန် အသင့်ရှိကြောင်း ဘိုးရင်းကုမ္ပဏီက ဇန်နဝါရီ ၈ ရက်တွင် ပြောကြားခဲ့သည်။ (Xinhua)